ՀՀ ներքին գործերի նախարարության «Սեյսմիկ պաշտպանության տարածքային ծառայության» և ուսումնական հաստատությունների համագործակցության արդյունքում կյանքի են կոչվում բազմաթիվ ծրագրեր։

Օրերս Գյումրու թիվ 4 հիմնական դպրոցի 8-րդ դասարանի աշակերտները ներկայացրին «Երկրաշարժերն անկանխատեսելի և վտանգավոր երևույթներ են» թեմայով նախագծային աշխատանք։ Հրավիրված էին ՍՊՏԾ հյուսիսային տարածաշրջանային կենտրոնի բնակչության հետ տարվող աշխատանքների բաժնի պետ Ելենա Սեխպոսյանը, գլխավոր մասնագետ Կարինե Սարգսյանը և առաջատար մասնագետ Հասմիկ Մանվելյանը։

Խմբերն անդրադարձան՝

• երկրաշարժի ծագմանն ու դրա պարամետրերին,

• սեյսմիկ վտանգի գնահատման և սեյսմիկ ռիսկի նվազեցման խնդիրներին,

• Հայաստանի տարածքում գրանցված պատմական երկրաշարժերին։

Խոսվեց նաև Սպիտակի երկրաշարժի հետևանքների և գործողությունների սխալների մասին, ինչը հանգեցրել էր մեծաքանակ մարդկային և նյութական կորուստների։ Որպես քաղված դաս՝ կարևորվեց սեյսմապաշտպանության վարքականոնների լավ իմացությունը։

ԲՏԱԲ բաժնի պետ Ելենա Սեխպոսյանի խոսքով՝ չափազանց գնահատելի է ուսուցիչների նախաձեռնողականությունը նմանատիպ հարցերում։ Նախագծի ղեկավար, զինղեկ Աննա Մինասյանն ամեն հարցում խորհրդակցել է մասնագետների հետ և կազմել նախագծային աշխատանքը։ Արդյունքում, դպրոցի ղեկավարության նախաձեռնությամբ տպագրվել են նաև թեմատիկ բուկլետներ, որոնք կհամալրեն դպրոցական գրադարանը։

Անի ԱՆՏՈՆՅԱՆ