Աշտարակ համայնքի Կարբիի թիվ 12 «Երեքնուկ» մանկապարտեզում ՀՀ ներքին գործերի նախարարության Սեյսմիկ պաշտպանության տարածքային ծառայության բնակչության հետ տարվող աշխատանքների վարչության մասնագետները հանդիպեցին մանկավարժների և սաների հետ։

«Ներկիր ինքդ» գունազարդման պատկերների միջոցով կրտսեր, միջին և ավագ խմբերի երեխաները ծանոթացան երկրաշարժի ժամանակ հանդիպող իրավիճակներին՝ ինչպես պատսպարվել սեղանի և կրող պատերի տակ, ինչպես հավաքել առաջին անվտանգության պայուսակ, ուր գնալ շենքից տարահանվելուց հետո, ինչ անել, եթե երկրաշարժի ժամանակ մեքենայում ես, ինչ հեռախոսահամարներով զանգահարել, եթե հայտնվել ես անելանելի վիճակում։

Մանկավարժները ուսուցանվեցին երկրաշարժից առաջ, դրա ընթացքում և հետո անհրաժեշտ գործողությունների մասին, քննարկեցին տարահանման ընթացքում հաճախ հանդիպող սխալները, երկրաշարժից առաջացած երկրորդային վտանգները, շենքերի կառուցվածքային փոփոխությունների հետևանքով ռիսկերի մեծացման հավանականությունը։

«Երեքնուկ» մանկապարտեզն առժամանակ գործունեություն է իրականացնում Արտաշեսավան համայնքում։ Այն ընդգրկված է «Մինչև 2026 թվականը կառուցվող, հիմնանորոգվող կամ վերակառուցվող 500 մանկապարտեզ և նախակրթարան» պետական ծրագրում։ Շուտով երեխաները հնարավորություն կունենան ուսանելու նոր, սեյսմակայուն շենքում։ 

ՏԵՍԱՆՅՈՒԹԸ՝ ԱՆԻ ԱՆՏՈՆՅԱՆԻ