Երևանի Մոնթե Մելքոնյանի անվան թիվ 11 հիմնական դպրոցի ավարտական դասարանի աշակերտները հյուրընկալվեցին Ներքին գործերի նախարարության Սեյսմիկ պաշտպանության տարածքային ծառայության Գառնիի երկրաֆիզիկական դիտարանում։ Այցը խորհրդանշանական էր, քանի որ դպրոցականները պատրաստում են «Երկրաշարժեր» թեմայով նախագծային աշխատանք՝ Սպիտակի ավերիչ երկրաշարժի տարելիցին ընդառաջ։

Բնակչության հետ տարվող աշխատանքների վարչության գլխավոր մասնագետ Հայկանուշ Եսայանը ներկայացրեց մեր տարածաշրջանում երկրաշարժերի առաջացման պատճառները, երկրաշարժից պաշտպանվելու վերաբերյալ գիտելիքի կարևորությունը, Սպիտակի երկրաշարժից քաղված դասերը և սեյսմակայուն շինարարության ոլորտում արված փոփոխությունները։ Ցուցադրվեց «Հաշտ ապրել երկրաշարժի հետ» ուսուցողական ֆիլմը։

Տվյալների հավաքագրման և օպերատիվ մշակման բաժնի պետ Նորայր Գրիգորյանը և Սեյսմոլոգիայի բաժնի գլխավոր մասնագետ Էդմոնդ Գևորգյանը խոսեցին Հայաստանում գրանցված պատմական երկրաշարժերի, ուժեղ երկրաշարժերի կրկնելիության, երկրաշարժին հաջորդող ուժեղ ցնցումների հավանականության, երկրաշարժի վերաբերյալ պաշտոնական լրատվության տարածման ընթացակարգի և այլ հարցերի շուրջ։

Սեյսմիկ վտանգի գնահատման համալիր վարչության պետի տեղակալ Հակոբ Ղազարյանն ու երկրաֆիզիկայի և երկրաբանության բաժնի գլխավոր մասնագետ Նաիրի Գրիգորյանը դիտարանի թունելախորշում ցուցադրեցին երկրաշարժի գրանցման ժամանակակից սարքավորումները, այդ թվում՝ միջազգային սեյսմոլոգիական ցանցի մաս հանդիսացող IRIS սեյսմիկ կայանը։

Շրջայցն ավարտվեց սեյսմաերկրաքիմիական անալիտիկ լաբորատորիայում, որտեղ առաջատար մասագետ Գայանե Մեհրաբյանն իրականացրեց նյութերի գունափոխման քիմիական փորձ։

Տեսանյութն ու լուսանկարները՝ ԱՆԻ ԱՆՏՈՆՅԱՆԻ