Շարունակվում են Ճապոնիայի միջազգային համագործակցության գործակալության (JICA) նախաձեռնությամբ իրականացվող փորձի փոխանակման առցանց սեմինարները։ Օրերս կայացավ երրորդ հանդիպումը՝ նվիրված Ճապոնիայում աղետների կանխարգելմանն ուղղված միջոցառումներին և Իվատե պրեֆեկտուրայի ջանքերին։ Դասընթացին մասնակցում էին նաև ՀՀ ներքին գործերի նախարարության «Սեյսմիկ պաշտպանության տարածքային ծառայության» աշխատակիցները։

Իվատե պրեֆեկտուրայի վերակառուցման և աղետների կանխարգելման վարչության աղետների կանխարգելման բաժնի մասնագետները ներկայացրին աղետների դեմ պայքարի հիմնական ակտի առանցքային հոդվածները, որոնք կարգավորում են՝

1․ աղետի ժամանակ դերերի բաշխումն ու համագործակցությունը կառավարության, տեղական ինքնակառավարման մարմինների և այլ հանրային հաստատությունների միջև, աղետների կանխարգելմանն ուղղված կամավոր աշխատանքների կազմակերպումը,

2․ համայնքային մակարդակում կանխարգելիչ քայլերի իրականացումը, այդ թվում՝ հրշեջ ծառայության և ջրհեղեղների կանխարգելման գործառույթ իրականացնող ջոկատների կարողությունների բարելավումը, համայնքի սահմաններում ԱՌՆ ոլորտում ներգրավված հասարակական և այլ կամավորական կազմակերպությունների գործունեության խթանումը։

3․ համայնքների բնակիչների կողմից նախապատրաստական աշխատանքները, մասնավորապես՝ սննդի, խմելու ջրի և այլ առաջին անհրաժեշտության պարագաների պահեստավորումը, կամավորական աշխատանքներին անդամագրումը և այլն։

Խոսվեց նաև աղետների կանխարգելման միջոցառումների հիմնական բաղադրիչներից։ Դրանք են ինքնօգնությունը, փոխօգնությունը և հանրային աջակցությունը։ Մեծ Հանշին-Ավաջի երկրաշարժի օրինակով կարևորվեցին հատկապես հանրային աջակցության սահմանափակումները, քանի որ փորձը ցույց է տվել՝ լայնածավալ աղետից հետո հակաղետային միջոցառումներն արդյունավետ չեն, քանի դեռ ինքնօգնությունը, փոխօգնությունը և հանրային աջակցությունը համակարգված չեն։

Ճապոնացի մասնագետները ներկայացրին նաև տարածաշրջանում ԱՌՆ կրթության իրականացման գործնական ուղեցույցը, որի նպատակն է ուժեղացնել տարածաշրջանում աղետների կանխարգելման կարողությունները, նպաստել իրազեկվածության բարձրացմանն ու խթանել համագործակցությունը։ Ուղեցույցի թիրախային լսարանը ոչ միայն կրթական և սոցիալական կազմակերպություններն են, այլև տեղի բնակիչների և կամավորների խմբերը, ՏԻՄ-երը և այլք, ովքեր ներգրավված են ԱՌՆ կրթության ոլորտում։

Ճապոնացի մասնագետները խորհուրդ տվեցին առաջին հերթին կրթել ինքդ քեզ՝ ծանոթանալով քո տարածաշրջանի առանձնահատկություններին և խնդիրներին, նախկինում գրանցված աղետներին, մշակելով տարբեր նախաձեռնություններ ու քննարկելով շահագրգիռ կողմերի հետ։

Հաջորդ առցանց սեմինարը կկայանա մարտ ամսին։

ԱՆԻ ԱՆՏՈՆՅԱՆ