Մարտի 11-ին ՀՀ ներքին գործերի նախարարության «Սեյսմիկ պաշտպանության տարածքային ծառայության» բնակչության հետ տարվող աշխատանքների վարչության պետ Սյուզաննա Կակոյանը սեմինար-քննարկում անցկացրեց Խաչատուր Աբովյանի անվան հայկական պետական մանկավարժական համալսարանում՝ բուհի կենսաբանության, քիմիայի և աշխարհագրության ֆակուլտետի հրավերով։ Ներկայացվեցին սեյսմիկ ռիսկի նվազեցման միջոցառումները, կարևորվեց սեյսմապաշտպանության թեմայով հանրության իրազեկվածության բարձրացումը։

Հանդիպմանը ներկա էին բուհի դասախոսական և ուսանողական անձնակազմը, ինչպես նաև աշակերտներ Խաչատուր Աբովյանի անվան թիվ 2 հիմնական դպրոցից։ Աշխարհագրության և նրա դասավանդման մեթոդիկայի ամբիոնի ասիստենտ Վարդուհի Հովհաննիսյանի խոսքով՝ ֆակուլտետն ավելի քան 5 տարի համագործակցում է «Սեյսմիկ պաշտպանության տարածքային ծառայության» հետ: Բուհի ուսանողները, հետագայում նաև բուհն ավարտած և դասավանդող մանկավարժներն իրենց սաների հետ այցելում են Գառնիի երկրաֆիզիկական դիտարան։

«Կարևորում եմ բուհ-դպրոց-սեյսմիկ ծառայություն կապն ու համագործակցությունը։ Սա հնարավորություն է տալիս մանկավարժներին ծանոթանալ ոչ միայն սեյսմապաշտպանության հիմնահարցերին և ճիշտ ուղղորդել իրենց աշակերտներին, այլև ստեղծել իրազեկ ու պաշտպանված հասարակություն»,- հավելեց Վարդուհի Հովհաննիսյանը։

Լուսանկարները՝ այստեղ։ 

Անի ԱՆՏՈՆՅԱՆ