Ճապոնիայի միջազգային համագործակցության գործակալության (JICA) նախաձեռնությամբ օրերս կայացավ աղետների ռիսկի նվազեցման փորձի փոխանակման 4-րդ առցանց հանդիպումը՝ «Աղետների ռիսկերի նվազեցման կրթությունը Իվատե պրեֆեկտուրայում․ վերակառուցման կրթություն» խորագրով։ Բանախոսում էր Իվատե պրեֆեկտուրայի կրթության խորհրդի դպրոցական կրթության գրասենյակի, արդյունաբերության և վերակառուցման կրթության բաժնի ղեկավար պարոն Հիրոակի Թադան։ Սեմինարին մասնակցում էին նաև ՀՀ ներքին գործերի նախարարության «Սեյսմիկ պաշտպանության տարածքային ծառայության» աշխատակիցները։

Մատնանշելով Արևելյան Ճապոնիայում 2011 թվականին տեղի ունեցած 9 մագնիտուդով մեծ երկրաշարժը՝ ճապոնացի մասնագետը կարևորեց հատկապես երեխաների պատրաստվածությունը։ «Երկրաշարժն ու ցունամին հաղթահարելու և ապագան կերտելու համար մենք պետք է կրթենք այնպիսի սերունդ, որը կկարողանա աջակցել Իվատե պրեֆեկտուրային 10 կամ 20 տարի անց»,- ասաց կրթության բաժնի ղեկավարը։

Երեխաներին ԱՌՆ գործընթացներում ներառելուց առաջ անհրաժեշտ է, որ նրանցից յուրաքանչյուրը հասկանա՝ ինչ են երկրաշարժն ու ցունամին, դիտարկի ինքն իրեն և իր հարաբերությունները հասարակության հետ: Այս հարցում մեծ դեր է խաղում դպրոցը, որը նախաձեռնում է վերակառուցման կրթություն։ Այն ներառում է երեք կարևոր բաղադրիչ, որոնք պետք է սովորեցնել երեխային՝

• ապրել՝ ունենալով առողջ հոգեվիճակ ու ապրելակերպ, ֆիզիկական պատրաստվածություն, այլ մարդկանց և բնության հանդեպ պատասխանատվություն,

• լինել ներգրավված՝ սերտացնելով ընտանեկան, ընկերական և համայնքային կապերը,

• նախապատրաստվել՝ ծանոթանալով աղետներին, ձեռք բերելով աղետից փրկվելու տեսական ու գործնական հմտություններ։

Բանախոսը հավելեց՝ հենց դպրոցն է պատասխանատու աշակերտների և ուսուցչական անձնակազմի կյանքի համար։ Այդուհանդերձ Ճապոնիայում նույնպես անվտանգության խնդիրներ կան, որոնք արտացոլված են 2022 թվականից մեկնարկած դպրոցների անվտանգության խթանման 3-րդ ծրագրում։

Համաձայն դրա՝ 

•ճապոնական ուսումնական հաստատություններում պակասում են արդյունավետ նախաձեռնությունները,

• անվտանգության վերաբերյալ համայնքների, դպրոցների և ուսուցիչների ընկալումները տարբեր են,

• ժամանակի ընթացքում երկրաշարժի դառը փորձը մոռացվում է, և դրվում են այլ առաջնահերթություններ,

• դպրոցներում մոնիթորինգի արդյունքում գրանցվում է տվյալների անհամապատասխանություն,

• դպրոցները բավարար չափով հետևողականորեն չեն իրականացնում անվտանգության մասով իրենց պարտականությունները և այլն։

Խնդիրները լուծելու համար մշակվել են անվտանգության խթանմանն ուղղված քայլեր՝

• դպրոցների անվտանգության համար սահմանել տեսլական և խթանել տարբեր միջոցառումների իրագործումը,

• ապահովել բոլոր աշակերտների՝ անվտանգության մասին գիտելիքներ և կարողություններ ձեռք բերելը,

• սահմանել դպրոցի անվտանգության պլանի և ճգնաժամային կառավարման ձեռնարկի վերանայման ցիկլը,

• սերտորեն աշխատել և համագործակցել տեղական տարբեր կառույցների հետ՝ անվտանգության միջոցառումներում հաշվի առնելով երեխաների տեսակետները,

• իրականացնել ԱՌՆ գործնական վարժանքներ,

• հստակեցնել ուսուցչական անձնակազմի դերերի բաշխումը, ապահովել ընդհանուր փոխըմբռնում և այլն։

Ծրագրով նախատեսված է, որ յուրաքանչյուր դպրոցի համար պետք է մշակվի ճգնաժամային կառավարման ձեռնարկ, որը հարմարեցված է տվյալ դպրոցի և տվյալ տարածքի բնութագրերին։ Ձեռնարկում ներկայացվելու են հնարավոր վտանգները , դրանց արձագանքելու և երեխաների պաշտպանության վերաբերյալ կոնկրետ առաջարկներ։

Բանախոսը ներկայացրեց նաև Իվատե պրեֆեկտուրայում գործնական վարժանքների անցկացման ընթացակարգը, որը մեծամասամբ համընկնում է ՀՀ ՆԳՆ փրկարար ծառայության և Սեյսմիկ պաշտպանության տարածքային ծառայության որդեգրած քաղաքականությանը։

Անի ԱՆՏՈՆՅԱՆ